Mayın 31-i Azərbaycanın görkəmli xanəndəsi, Azərbaycan SSR-in Xalq artisti Sara Qədimovanın doğum günüdür.
Sara Qədimova 1922-ci il mayın 31-də Bakıda anadan olub. Əslən Ağdam rayonunun Abdal-Gülablı kəndindən olan sənətkar əmək fəaliyyətinə 1941-ci ildə Müslüm Maqomayev adına Azərbaycan Dövlət Filarmoniyasının solisti kimi başlayıb. Nadir səsi və yüksək ifaçılıq məharəti sayəsində qısa müddətdə dinləyicilərin rəğbətini qazanaraq Azərbaycanın tanınmış xanəndələrindən birinə çevrilib.
İkinci Dünya müharibəsi illərində dahi bəstəkar Üzeyir Hacıbəyov və xalq şairi Səməd Vurğunun yaratdığı “Şəfqət bacısı” mahnısını cəbhədə azərbaycanlı əsgərlər qarşısında ifa edən Sara Qədimova həmin əsəri qəhrəman Azərbaycan qadınının rəmzinə çevirib.
Onun sənətkar kimi formalaşmasında Hüseynqulu Sarabski, Xan Şuşinski və Seyid Şuşinski kimi ustadların mühüm rolu olub. Sara Qədimova klassik ifaçılıq ənənələrinə ömrünün sonunadək sadiq qalaraq Azərbaycan muğam sənətinin inkişafına böyük töhfələr verib.
Azərbaycan Dövlət Opera və Balet Teatrında fəaliyyət göstərən sənətkar Leyli və Əsli obrazlarının uğurlu ifası ilə opera səhnəsində də dərin iz qoyub. Onun ifa etdiyi “Bayatı-Şiraz”, “Şur”, “Şahnaz”, “Qatar”, “Mahur-hindi”, “Xaric segah” muğamları, eləcə də çoxsaylı xalq mahnıları milli musiqi tariximizin qiymətli nümunələri sırasında yer alır.
Xüsusilə “Qarabağ şikəstəsi”nin ifası Sara Qədimovanın yaradıcılığında xüsusi yer tutur. Güclü emosional təsiri, özünəməxsus üslubu və yüksək sənətkarlığı ilə seçilən xanəndə altmış ildən artıq yaradıcılıq fəaliyyəti boyunca Azərbaycan mədəniyyətinə xidmət edib.
Sara Qədimova Azərbaycan musiqisini dünyanın müxtəlif ölkələrində uğurla təmsil edib, milli musiqimizin təbliğində mühüm rol oynayıb. Lirik-koloratur soprano səsinə malik sənətkar 1941-ci ildən Azərbaycan Dövlət Filarmoniyasının, 1957-1962-ci illərdə isə Azərbaycan Dövlət Opera və Balet Teatrının aparıcı solistlərindən olub. 1978-ci ildən etibarən Azərbaycan Dövlət Qastrol-Konsert Birliyində fəaliyyət göstərib.
Azərbaycan muğam sənətinin görkəmli nümayəndəsi Sara Qədimova 2005-ci il mayın 12-də vəfat edib. Onun zəngin yaradıcılığı və sənət irsi bu gün də Azərbaycan musiqi mədəniyyətinin dəyərli səhifələrindən biri hesab olunur.
