İyunun 8-də İstanbul şəhərində Azərbaycan, Türkiyə və Gürcüstan xarici işlər nazirlərinin 10-cu üçtərəfli görüşü keçiriləcək.

Qanuntv.az xəbər verir ki, bu barədə "Anadolu" agentliyi Türkiyə Xarici İşlər Nazirliyindəki mənbələrə istinadən məlumat yayıb.

Bildirilib ki, Türkiyənin xarici işlər naziri Hakan Fidanın ev sahibliyi ilə təşkil olunacaq görüşdə Azərbaycanın xarici işlər naziri Ceyhun Bayramov və Gürcüstanın xarici işlər naziri Maka Boçorişvili iştirak edəcəklər.

Görüş çərçivəsində üç ölkə arasında mövcud əməkdaşlıq əlaqələrinin vəziyyəti qiymətləndiriləcək, həmçinin qarşıdakı dövr üçün əməkdaşlığın genişləndirilməsi istiqamətində birgə fəaliyyət sahələri müzakirə olunacaq.

Müzakirələrin əsas mövzuları sırasında regional proseslər, xarici siyasət məsələləri, Cənubi Qafqazda əməkdaşlığın gücləndirilməsi, nəqliyyat və tranzit imkanlarının artırılması, enerji təhlükəsizliyi, ticarət əlaqələri və iqtisadi əməkdaşlığın dərinləşdirilməsi yer alacaq.

Məlumata görə, Hakan Fidan çıxışında geosiyasi qeyri-müəyyənliklərin, iqtisadi çağırışların və təhlükəsizlik risklərinin artdığı müasir dövrdə Cənubi Qafqazın strateji əhəmiyyətinin daha da yüksəldiyini vurğulayacaq.

Nazirin, həmçinin son illərdə qlobal tədarük zəncirlərində baş verən dəyişikliklər, enerji təhlükəsizliyi məsələləri və geosiyasi transformasiyalar fonunda Avropa ilə Asiya arasında mühüm bağlantı rolunu oynayan Orta Dəhlizin əhəmiyyətinin artdığını diqqətə çatdıracağı gözlənilir. Bu çərçivədə, xüsusilə Bakı-Tbilisi-Qars dəmiryolu xətti başda olmaqla regional nəqliyyat layihələrinin inkişafı və logistika şəbəkələrinin genişləndirilməsi prioritet istiqamətlərdən biri kimi dəyərləndirilir.

Qeyd edək ki, Azərbaycan-Türkiyə-Gürcüstan xarici işlər nazirlərinin üçtərəfli formatda ilk görüşü 2012-ci il iyunun 8-də Trabzonda, sonuncu görüş isə 2024-cü il martın 15-də Bakıda keçirilib.