Ağdaşda bir qrup valideyn övladlarının birinci sinfə qəbulu ilə bağlı yaranmış vəziyyətdən narazılıq edib.
Qanuntv.az xəbər verir ki, valideynlərin iddiasına görə, Ağdaş şəhəri Bəkir Nəbiyev adına 3 nömrəli tam orta məktəbin rus bölməsi üzrə müsahibədən uğurla keçmiş 21 şagirdin məktəbə qəbulu sonradan dayandırılıb.
Valideynlər bildirirlər ki, övladları qəbul prosesində iştirak edərək müəyyən edilmiş tələbləri yerinə yetiriblər və təhsil almaq hüququ qazanıblar. Onların sözlərinə görə, buna baxmayaraq, uşaqların məktəbə qəbulunda problem yaranıb.
Məsələ ilə bağlı Mərkəzi Aran Regional Təhsil İdarəsi açıqlama verib. Qurumdan bildirilib ki, birinci sinfə qəbul prosesi ölkədə hər bir uşağın ümumi təhsil alma hüququnun təmin edilməsinə xidmət edir və bütün mərhələlər şəffaf şəkildə həyata keçirilir.
Qeyd olunub ki, qəbul prosesi elektron sistem üzərindən aparılır və mayın 6-dan indiyədək 106 minə yaxın uşağın birinci sinfə qəbulu uğurla tamamlanıb.
Açıqlamaya əsasən, sinif komplektlərinin formalaşdırılması yalnız qəbul prosesinin bütün mərhələləri başa çatdıqdan sonra həyata keçiriləcək. Həmçinin vurğulanıb ki, müsahibə mərhələsi müsabiqə xarakteri daşımır və yalnız uşaqların seçilmiş tədris dili üzrə bilik və bacarıqlarının qiymətləndirilməsi məqsədi daşıyır.
Məlumata görə, müsahibədən uğurla keçən uşaqların valideynləri iyunun 17-dən etibarən məktəb və müəllim seçimi mərhələsində iştirak edə biləcəklər.
Təhsil idarəsi əlavə edib ki, birinci sinfə qəbul prosesi sentyabr ayınadək davam edəcək və bütün mərhələlər əvvəlcədən müəyyən edilmiş qrafikə uyğun həyata keçiriləcək.
Qeyd edək ki, Mərkəzi Aran Regional Təhsil İdarəsi valideynlərin müraciətində qeyd olunan 21 şagirdlə bağlı iddialara birbaşa münasibət bildirməyib.
