Azərbaycanda Bakıdakı ali təhsil müəssisələrinin başqa bölgələrə köçürülməsi planlaşdırılmır. Bunun əvəzinə universitetlərdə tələbə sayının optimallaşdırılması və təhsilin keyfiyyətinin artırılması istiqamətində işlər aparılacaq.
Elm və təhsil naziri Emin Əmrullayev bildirib ki, hazırda tələbə kontingentinin təxminən üçdəikisi Bakı və ətraf ərazilərdə yerləşən universitetlərdə, üçdəbiri isə regionlardakı ali təhsil müəssisələrində təhsil alır.
Nazirin sözlərinə görə, son illərdə ali təhsilə çıxış imkanları genişləndiyi üçün tələbələrin sayı artıb. Bununla yanaşı, region universitetlərinin inkişafı da diqqətdə saxlanılır.
Emin Əmrullayev qeyd edib ki, Mingəçevir Dövlət Universitetinin yeni kampusu tikilir, Qarabağ Universiteti fəaliyyətə başlayıb, Naxçıvan Dövlət Universiteti və Lənkəran Dövlət Universitetində imkanlar genişləndirilir, Azərbaycan Dövlət İqtisad Universitetinin Zaqatala filialı fəaliyyət göstərir.
Nazir vurğulayıb ki, köklü universitetləri köçürməkdənsə, tələbə sayının azaldılması və təhsil keyfiyyətinin yüksəldilməsi daha məqsədəuyğundur.
Onun sözlərinə görə, ali təhsildə əsas məqsəd kəmiyyətlə yanaşı keyfiyyətin təmin edilməsidir. Tələbə sayının həddindən artıq artması bəzi hallarda təhsilin səviyyəsinə təsir göstərə bilər.
Emin Əmrullayev bildirib ki, islahatların əsas istiqamətlərindən biri Bakıda tələbə sıxlığının azaldılması, region universitetlərinin imkanlarının artırılması və gənclərin keyfiyyətli təhsil almaq üçün bölgələrə yönləndirilməsidir.
Nazir əlavə edib ki, regionlarda yerləşən bəzi universitetlər müəyyən ixtisaslar üzrə Bakıdakı ali məktəblərdən daha yüksək nəticələr göstərə bilir.
Qeyd olunub ki, qarşıdakı dövrdə qəbul yerlərinin tənzimlənməsi, maliyyələşmənin gücləndirilməsi və ali təhsilin keyfiyyətinin artırılması istiqamətində tədbirlər davam etdiriləcək.
