Türkmənistan Prezidenti Sərdar Berdiməhəmmədovun Azərbaycana dövlət səfərinin ən yaddaqalan məqamlarından biri Qarabağa ziyarəti olub.

QanunTV.az xəbər verir ki, iyunun 23-də Füzuli Beynəlxalq Hava Limanına gələn Türkmənistan liderini Azərbaycan Prezidenti İlham Əliyev qarşılayıb. Hava limanında ali qonağın şərəfinə fəxri qarovul dəstəsi düzülüb.

Səfər çərçivəsində Füzuli, Ağdam və Xocavənd rayonlarına səfər edən prezidentlər işğal dövründə dağıdılmış ərazilərlə tanış olublar.

Azərbaycan Prezidentinin xüsusi nümayəndəsi Emin Hüseynov qonağa Ermənistanın 30 illik işğalı zamanı törədilən dağıntılar, vandalizm aktları və azad edilmiş ərazilərdə aparılan yenidənqurma işləri barədə məlumat verib.

Bildirilib ki, işğaldan azad edildikdən sonra Füzuli şəhərinin Baş Planı hazırlanaraq təsdiqlənib. Müasir şəhərsalma prinsipləri əsasında yenidən qurulan şəhərdə “ağıllı şəhər” konsepsiyasının tətbiqi nəzərdə tutulur.

Səfər zamanı Türkmənistanın dəstəyi ilə Füzulidə inşa ediləcək məscid layihəsi də təqdim olunub. Bir hektardan çox ərazini əhatə edəcək məscid kompleksində iki 40 metrlik minarənin inşası planlaşdırılır. Məsciddə eyni vaxtda 500 nəfərin ibadət etməsi üçün şərait yaradılacaq.

Bu layihə Azərbaycan-Türkmənistan dostluğunun və türk dünyası həmrəyliyinin növbəti göstəricisi kimi qiymətləndirilir.