Azərbaycan Respublikasının müdafiə naziri, general-polkovnik Zakir Həsənov ölkəmizdə səfərdə olan Türkiyənin "Baykar" şirkətinin İdarə Heyətinin sədri Selçuk Bayraktarın rəhbərlik etdiyi nümayəndə heyəti ilə görüş keçirib.

Görüş zamanı Azərbaycan ilə Türkiyə arasında qardaşlıq və strateji müttəfiqlik münasibətlərinin bütün sahələrdə olduğu kimi, hərbi və hərbi-texniki istiqamətlərdə də uğurla inkişaf etdiyi vurğulanıb. Müdafiə naziri Zakir Həsənov müdafiə sənayesində əldə olunan nailiyyətlərin iki ölkə arasında əməkdaşlığın daha da dərinləşməsinə mühüm töhfə verdiyini bildirib.

Nazir "Baykar" şirkətinin Türkiyənin müdafiə sənayesində xüsusi yerə malik olduğunu qeyd edərək, müasir texnologiyaların tətbiqi və birgə istehsalat imkanlarının genişləndirilməsinin regional təhlükəsizliyin möhkəmləndirilməsi baxımından əhəmiyyətini diqqətə çatdırıb.

Selçuk Bayraktar isə göstərilən yüksək qonaqpərvərliyə görə təşəkkürünü ifadə edib, qarşılıqlı səfərlərin və yüksək səviyyəli təmasların Azərbaycan-Türkiyə hərbi əməkdaşlığının inkişafına mühüm təsir göstərdiyini bildirib.

Görüşdə həmçinin Türkiyə Respublikasının Azərbaycandakı fövqəladə və səlahiyyətli səfiri Birol Akgün iştirak edib. Tərəflər pilotsuz uçuş aparatları, radioelektron mübarizə sistemləri, insansız platformalar və müdafiə sənayesinin digər perspektiv istiqamətləri üzrə geniş fikir mübadiləsi aparıblar.

Qeyd edək ki, Azərbaycan və Türkiyə arasında müdafiə sahəsində əməkdaşlığın davamlı şəkildə genişlənməsi regionda təhlükəsizlik və sabitliyin təmin olunmasına, eyni zamanda müasir hərbi texnologiyaların tətbiqinin sürətləndirilməsinə mühüm töhfə verir.