"Son 80 il ərzində heç bir dövlət, heç bir xalq buna oxşar qələbə qazanmamışdır. Özü də cəmi 44 gün ərzində".
Qanuntv.az xəbər verir ki, bu fikirləri Azərbaycan Respublikasının Prezidenti İlham Əliyev Xocavənd rayonunun Quzeyxırman və Güneyxırman kəndlərinə köçən sakinlərlə görüşü zamanı səsləndirib.
Dövlət başçısı bildirib ki, hazırda dünyanın müxtəlif bölgələrində davam edən müharibələr və münaqişələr fonunda Azərbaycanın əldə etdiyi tarixi Zəfərin miqyası daha aydın görünür.
Prezident qeyd edib ki, Ermənistanın arxasında bir sıra böyük dövlətlərin dayanmasına, Azərbaycan üzərinə müxtəlif təzyiq və təhdidlərin göstərilməsinə baxmayaraq, ölkəmiz öz məqsədinə nail olub.
"Haqq-ədalət bizim tərəfimizdə idi, güclü iradə bizdə idi və Azərbaycan xalqı birləşmişdi", – deyə dövlət başçısı vurğulayıb.
Prezident İlham Əliyev 44 günlük Vətən müharibəsi zamanı Azərbaycan Ordusunun və xalqının nümayiş etdirdiyi birlik və qəhrəmanlığın misilsiz olduğunu qeyd edərək bildirib ki, döyüşlər zamanı bir nəfər belə döyüş meydanını tərk etməyib.
Dövlət başçısı, həmçinin Ermənistan tərəfinin minlərlə fərari ilə üzləşdiyini xatırladaraq, Azərbaycan gənclərinin Vətən uğrunda göstərdiyi fədakarlığı xüsusi vurğulayıb.
Prezident İlham Əliyev şəhidlərimizin əziz xatirəsini yad edərək qeyd edib ki, Qarabağı işğaldan azad edən qəhrəmanların böyük əksəriyyəti həmin torpaqları heç vaxt görməsələr də, xalqın qəlbində yaşayan Qarabağ sevgisi və milli ruh onları Zəfərə aparıb.
"Qarabağ ağrısı xalqımızı bir amal ətrafında birləşdirmişdi. Hər bir vətənpərvər insan Qələbəyə öz töhfəsini vermək arzusu ilə yaşayırdı", – deyə dövlət başçısı bildirib.
Qanuntv.az
