İyulun 21-də Azərbaycan Respublikasının Prezidenti İlham Əliyev Almaniya Federativ Respublikasına işgüzar səfəri çərçivəsində Berlində Almaniyanın Federal Kansleri Fridrix Merts ilə təkbətək görüş keçirib.
Daha sonra görüş nümayəndə heyətlərinin iştirakı ilə geniş tərkibdə davam etdirilib.
Görüş zamanı Azərbaycan ilə Almaniya arasında imzalanmış "İkitərəfli tərəfdaşlığın strateji gündəliyi haqqında Birgə Bəyannamə"nin əhəmiyyəti xüsusi vurğulanıb. Bildirilib ki, sənəddən irəli gələn öhdəliklərin icrası məqsədilə müxtəlif sahələr üzrə birgə işçi qruplarının yaradılması və əməkdaşlığın sistemli şəkildə inkişaf etdirilməsi vacibdir.
Tərəflər Azərbaycanın Avropanın enerji təhlükəsizliyinin təmin olunmasında oynadığı mühüm rolu, eləcə də Avropa ilə Asiyanı birləşdirən Orta Dəhliz layihəsinin strateji əhəmiyyətini müzakirə ediblər.
Söhbət zamanı iki ölkə arasında siyasi və iqtisadi münasibətlərin inkişafında qarşılıqlı yüksək səviyyəli səfərlərin əhəmiyyətinə toxunulub, regional və beynəlxalq gündəlikdə duran məsələlər ətrafında geniş fikir mübadiləsi aparılıb.
Görüşdə Almaniyanın Federal Kansleri Fridrix Merts Azərbaycan ilə Ermənistan arasında sülh prosesində əldə olunan irəliləyişi yüksək qiymətləndirərək Prezident İlham Əliyevi bu münasibətlə təbrik edib.
Kansler Almaniyanın Cənubi Qafqazda davamlı sülhün və sabitliyin təmin olunmasına dəstək verməyə hazır olduğunu bildirib və regionda sülh gündəliyinin irəli aparılması istiqamətində səylərini davam etdirəcəyini vurğulayıb.
Qeyd edək ki, Prezident İlham Əliyevin Almaniyaya səfəri çərçivəsində keçirilən görüşlər iki ölkə arasında siyasi dialoqun, iqtisadi əməkdaşlığın, enerji təhlükəsizliyi, nəqliyyat-logistika, investisiya və digər strateji istiqamətlər üzrə tərəfdaşlığın daha da genişləndirilməsinə xidmət edir.
