Azərbaycan Respublikasının Prezidenti İlham Əliyev Özbəkistanın Milli İnformasiya Agentliyinə (UzA) müsahibə verib.
Müsahibəsində dövlət başçısı Azərbaycan-Özbəkistan münasibətlərinin hazırkı vəziyyəti, strateji tərəfdaşlıq və müttəfiqlik əlaqələrinin inkişafı, iqtisadi-ticari əməkdaşlıq, investisiya layihələri, enerji və nəqliyyat sahəsində birgə fəaliyyət, eləcə də mədəni-humanitar əlaqələr barədə ətraflı fikirlərini bölüşüb.
Prezident İlham Əliyev bildirib ki, Azərbaycan və Özbəkistan arasında münasibətlər ortaq tarixə, mədəniyyətə, dil və mənəvi dəyərlərə, xalqların əsrlər boyu formalaşdırdığı dostluq və qardaşlıq bağlarına əsaslanır. Dövlətlərarası əlaqələrin son illərdə misli görünməmiş inkişaf mərhələsinə qədəm qoyduğunu vurğulayan Prezident münasibətlərin ən yüksək səviyyəyə – müttəfiqlik səviyyəsinə yüksəldiyini qeyd edib.
Dövlət başçısı Özbəkistan Prezidenti Şavkat Mirziyoyevlə münasibətlərinin Azərbaycan-Özbəkistan qardaşlığının möhkəmlənməsində xüsusi rol oynadığını bildirib.
İlham Əliyev qeyd edib ki, son beş ildə iki ölkə arasında yüksək səviyyədə 15 qarşılıqlı səfər və çoxsaylı təmaslar həyata keçirilib. 2024-cü ildə Azərbaycanın Özbəkistana dövlət səfəri, 2025-ci ildə isə Özbəkistan Prezidentinin Azərbaycana dövlət səfəri zamanı mühüm sənədlər imzalanıb.
Prezident iqtisadi-ticari əlaqələrin də sürətlə inkişaf etdiyini diqqətə çatdırıb. Bildirib ki, 2025-ci ildə Azərbaycanla Özbəkistan arasında ticarət dövriyyəsi əvvəlki illə müqayisədə üç dəfədən çox artaraq 795 milyon dollar təşkil edib.
Müsahibədə Azərbaycan-Özbəkistan İnvestisiya Şirkətinin fəaliyyəti, energetika, neft-qaz, yaşıl enerji, tranzit və logistika sahələrində əməkdaşlıqdan da bəhs olunub.
Dövlət başçısı iki ölkə arasında tranzit daşımalarının artdığını bildirib. 2025-ci ildə daşımaların həcminin 1,4 milyon tona çatdığı, 2026-cı ilin ilk yarısında isə artım dinamikasının davam etdiyi qeyd olunub.
Prezident İlham Əliyev işğaldan azad edilmiş Füzuli rayonunda Özbəkistanın iştirakı ilə həyata keçirilən layihələri, o cümlədən 100 hektarlıq “Dostluq bağı”nın salınmasını xüsusi vurğulayıb. Həmçinin “Chevrolet” və “Isuzu” markalı avtomobillərin istehsalı sahəsində əməkdaşlığın nəticələri diqqətə çatdırılıb.
Mədəni-humanitar əlaqələrə toxunan Prezident iki ölkə arasında mədəniyyət günlərinin, festivalların, elmi və humanitar tədbirlərin keçirildiyini bildirib. Özbəkistanda Nizami Gəncəvinin adını daşıyan ali təhsil müəssisəsinin fəaliyyət göstərməsinin Azərbaycan xalqı üçün qürurverici olduğunu qeyd edib.
İlham Əliyev Bakıda yaradılacaq “Özbəkistan” parkının Azərbaycan-Özbəkistan qardaşlığının rəmzlərindən birinə çevriləcəyini bildirib.
Təhsil sahəsində əməkdaşlığın da genişləndiyini qeyd edən Prezident 2025-2026-cı tədris ilində Özbəkistanın 67 vətəndaşının Azərbaycanda, Azərbaycanın isə 176 vətəndaşının Özbəkistanda təhsil aldığını açıqlayıb.
Dövlət başçısı Füzuli şəhərində Özbəkistanın təşəbbüsü ilə inşa edilən Mirzə Uluqbəy adına orta məktəbi iki ölkə arasındakı qardaşlığın nümunəsi kimi dəyərləndirib.
Müsahibədə Türk Dövlətləri Təşkilatı çərçivəsində əməkdaşlıq və Azərbaycan-Mərkəzi Asiya münasibətlərinin inkişaf perspektivləri də geniş müzakirə olunub. Prezident İlham Əliyev Azərbaycanın Mərkəzi Asiya Dövlət Başçılarının Məşvərət görüşlərində tamhüquqlu iştirakının regional əməkdaşlığa yeni imkanlar yaratdığını vurğulayıb.
Dövlət başçısı Azərbaycan və Özbəkistanın beynəlxalq təşkilatlar çərçivəsində də bir-birini dəstəklədiyini, iki ölkənin siyasi, iqtisadi, nəqliyyat, humanitar və digər sahələrdə əməkdaşlığının bundan sonra da genişlənəcəyinə əminliyini ifadə edib.
Müsahibənin sonunda Prezident İlham Əliyev Özbəkistan xalqını ölkənin dövlət müstəqilliyinin qarşıdan gələn 35-ci ildönümü münasibətilə təbrik edib, qardaş Özbəkistan xalqına sülh, əmin-amanlıq, tərəqqi və yeni nailiyyətlər arzulayıb.
Qeyd: Müsahibə Özbəkistanın Milli İnformasiya Agentliyində yayımlanıb.
