Azərbaycan Respublikasının Prezidenti İlham Əliyev Azərbaycanla Türkmənistan arasında əməkdaşlığın müxtəlif istiqamətlərini əhatə edən beş mühüm sənədi təsdiqləyib.

Qanuntv.az xəbər verir ki, dövlət başçısı bununla bağlı müvafiq fərmanlar imzalayıb.

Təsdiqlənən sənədlər iki ölkə arasında iqtisadi, müdafiə, energetika, gömrük və qida təhlükəsizliyi sahələrində əməkdaşlığın daha da genişləndirilməsini nəzərdə tutur.

Sənədlər aşağıdakılardır:

1. Azərbaycan Respublikası Hökuməti ilə Türkmənistan Hökuməti arasında iqtisadi əməkdaşlığın inkişafı və dərinləşdirilməsinin əsas istiqamətləri haqqında Saziş;

2. Azərbaycan Respublikası Hökuməti ilə Türkmənistan Hökuməti arasında müdafiə sahəsində əməkdaşlıq haqqında Anlaşma Memorandumu;

3. Azərbaycan Respublikası Hökuməti ilə Türkmənistan Hökuməti arasında energetika sahəsində əməkdaşlıq haqqında Saziş;

4. Azərbaycan Respublikasının Dövlət Gömrük Komitəsi ilə Türkmənistanın Dövlət Gömrük Xidməti arasında qarşılıqlı ticarətin gömrük statistikası sahəsində əməkdaşlıq haqqında Protokol;

5. Azərbaycan Respublikası Hökuməti ilə Türkmənistan Hökuməti arasında qida təhlükəsizliyi sahəsində əməkdaşlıq haqqında Saziş.

Qeyd edək ki, sözügedən sənədlər 2026-cı il iyunun 22-də Bakı şəhərində imzalanıb.

Sənədlərin təsdiqlənməsi Azərbaycan-Türkmənistan münasibətlərinin müxtəlif sahələr üzrə hüquqi bazasının daha da möhkəmləndirilməsi və qarşılıqlı əməkdaşlığın genişləndirilməsi baxımından mühüm əhəmiyyət daşıyır.