İşğaldan azad edilmiş Xocavənd rayonunun Düdükçü kəndi ərazisində mina partlayışı nəticəsində xəsarət alan şəxs xəstəxanadan evə buraxılıb.

Qanuntv.az xəbər verir ki, 1983-cü il təvəllüdlü Ramal Qiyas oğlu Şirinov avqustun 21-də baş verən hadisə zamanı müxtəlif bədən xəsarətləri alıb.

Hadisə minatəmizləmə fəaliyyəti başa çatmayan ərazidə baş verib. Məlumata görə, Ramal Şirinovun idarə etdiyi traktor minaya düşüb.

Xəsarət alan şəxs saat 14 radələrində Füzuli Rayon Mərkəzi Xəstəxanasının Təcili tibbi yardım şöbəsinə yerləşdirilib.

TƏBİB-dən verilən məlumata görə, pasiyentə baş, boyun və üzün sol yarısının, eləcə də yuxarı ətraf və bud nahiyəsinin çoxsaylı qəlpə yaraları diaqnozu qoyulub.

Ona zəruri tibbi xidmətlər göstərilib. Vəziyyəti stabil qiymətləndirilən Ramal Şirinov ambulator müalicə üçün evə buraxılıb.

Faktla bağlı Xocavənd Rayon Prokurorluğunda araşdırma aparılır.

ANAMA, DİN və Baş Prokurorluq bir daha vətəndaşları mina təhlükəsi ilə bağlı təhlükəsizlik qaydalarına ciddi əməl etməyə, mina təhlükəsi barədə xəbərdarlıq nişanlarına diqqət yetirməyə, şübhəli əşyalara toxunmamağa və tanımadıqları ərazilərə daxil olmamağa çağırıb.

Həmçinin çəpərləmə və digər təhlükəsizlik tədbirləri həyata keçirilən ərazilərə müdaxilə edilməməsi tövsiyə olunub.