Rusiya Prezidenti Vladimir Putin Tver vilayətində baş verən təyyarə qəzasında həlak olanların ailələrinə başsağlığı verib.

Bu barədə “Meduza” nəşri məlumat yayıb.

Putin Yevgeni Priqojin haqqında ayrıca danışıb.

“Mən Priqojini 1990-cı illərin əvvəllərindən tanıyıram. O, çətin taleyi olan bir insan idi və həyatda ciddi səhvlərə yol verdi. O, istedadlı insan, istedadlı iş adamı idi. Priqojin təkcə bizdə deyil, həm də xaricdə, xüsusən də Afrikada işləyirdi. Bildiyimə görə, o, dünən Afrikadan təzə qayıdıb və burada bəzi məmurlarla görüşüb.

İstintaq Komitəsinin rəhbəri bu gün səhər mənə məlumat verdi, onlar artıq bu hadisə ilə bağlı ilkin araşdırmaya başlayıblar. Proses tam şəkildə həyata keçiriləcək və sona çatdırılacaq. Burada heç bir şübhə yoxdur. Görək yaxın vaxtlarda müstəntiqlər nə deyəcək. İndi isə ekspertiza aparılır. Bu bir qədər vaxt aparır” , - deyə Putin bildirib.