AZAL-ın Bakı–Qroznı reysi ilə uçan təyyarəsinin Rusiya tərəfindən vurulmasından bir il keçsə də, Moskva hələ də Bakının tələblərini icra etməyib.
Azərbaycanın mövqeyi dəyişməz olaraq qalır: baş vermiş qəzaya görə üzrxahlıq edilməli, təzminat ödənilməli və günahkarlar cəzalandırılmalıdır.
9 oktyabrda Azərbaycan və Rusiya prezidentlərinin Düşənbə görüşündə Putin İlham Əliyevin tələblərini qəbul etmiş, təzminatın ödəniləcəyini və günahkarların cəzalandırılacağını bildirmişdi. Lakin iki ay yarım keçməsinə baxmayaraq, Moskva bu öhdəlikləri praktiki olaraq yerinə yetirmir.
Azərbaycan tərəfi istintaqın yekunlaşmasını gözləməklə bağlı Moskvanın mövqeyini adekvat saymır və tələblərin dərhal icrasını tələb edir.
Prezident İlham Əliyevin Sankt-Peterburqa getməməsi isə Azərbaycanın prinsipial mövqeyini nümayiş etdirib.