Kənd təsərrüfatı, ekologiya və bəzi digər sahələrdə yaxın illərdə yeni ixtisasların yaranacağı gözlənilir. Bu sahələr hazırda sürətlə inkişaf edir.
Qanuntv.az xəbər verir ki, bu fikirləri Dövlət İmtahan Mərkəzinin (DİM) İdarə Heyətinin sədri Məleykə Abbaszadə Oxu.Az-a müsahibəsində səsləndirib.
O bildirib ki, cəmiyyətdə bəzi ixtisaslara qarşı formalaşmış stereotiplər hələ də qalmaqdadır:
“Vaxtilə mən tətbiqi riyaziyyatı seçəndə deyirdilər ki, ‘qız hara, riyaziyyat hara, bu peşə deyil’. Bu cür yanaşmalar cəmiyyətdə həmişə olub”, – deyə sədr vurğulayıb.
Məleykə Abbaszadə qeyd edib ki, xüsusilə kənd təsərrüfatı və ekologiya sahələrində real və peşəkar mütəxəssislərə ciddi ehtiyac var:
“150 balla aqronomluğa qəbul olub, dörd ili formal şəkildə oxuyaraq diplom alan şəxsin əmək bazarında iş tapması çətin ola bilər. Halbuki hazırda aqronomlara və baytarlara böyük tələbat var. Hətta bu mütəxəssisləri Türkiyədən dəvət edib 10–15 min manat maaş verirlər. Çünki onlar peşəkardırlar”, – deyə o əlavə edib.
DİM sədri vurğulayıb ki, bu ixtisaslara yüksək bal toplayan abituriyentlər yönəlməli, tədris prosesi isə müasir texnologiyalar və ciddi nəzəri baza üzərində qurulmalıdır. Bu halda məzunların əmək bazarında iş tapmaq imkanları da artacaq.
