Azərbaycan Prezidenti İlham Əliyev regiondakı sabitlik və təhlükəsizlik məsələlərinə toxunub. Onun sözlərinə görə, hər bir ölkə, o cümlədən Azərbaycan, yalnız öz sərhədləri daxilində deyil, həm də sərhədlərdən kənarda baş verə biləcək prosesləri diqqətdə saxlamalıdır.
Prezident bildirib ki, ölkə daxilində heç bir potensial risk müşahidə edilmir və əsas məqsəd sabitliyin qorunması, regional əməkdaşlığın gücləndirilməsi və tərəfdaşlara etibarlı enerji təchizatının təmin edilməsidir.
“Bütün potensial risklər xaricdən gələ bilər. Bu səbəbdən qonşuluğumuzda sabitlik daim diqqət mərkəzindədir və İran ətrafında baş verə biləcək mümkün destabilizasiya bizi narahat edir”, – deyə İlham Əliyev vurğulayıb.
O əlavə edib ki, regionda sabitlik, proqnozlaşdırıla bilənlik və sülh Azərbaycan üçün ən böyük dəyərlərdir. “Biz işğaldan, müharibədən əziyyət çəkmişik, minlərlə insan itirmişik. Bu gün hər bir ölkə üçün sabitlik və təhlükəsizlik uğurun yeganə yoludur”, – Prezident qeyd edib.