Xəbər verdiyimiz kimi, parlamentin Elm və təhsil komitəsinin bu gün keçirilən iclasında Milli Məclisin deputatı Ceyhun Məmmədov Azərbaycanda orta məktəb dərsliklərinin rəqəmsallaşdırılmasını təklif edib. Deputat bildirib ki, bu addım dərsliklərdə yol verilən səhvlərin daha operativ şəkildə aradan qaldırılmasına imkan verəcək.
Mövzu ilə bağlı AZXEBER.COM-a açıqlama verən təhsil eksperti Elçin Əfəndi qeyd edib ki, hazırda dünyanın əksər ölkələrində elektron dərsliklərdən geniş istifadə olunur.
Onun sözlərinə görə, elektron dərsliklərin tətbiqində əsas məqsəd ilk növbədə təhsilin əlçatanlığının təmin olunmasıdır:
“Elektron dərsliklər vasitəsilə istənilən şagird dərs vəsaitini asanlıqla əldə edə bilir. Digər əsas məqsəd isə ekoloji balansın qorunmasıdır. Kağız daşıyıcılı dərsliklər ağac emalı hesabına hazırlandığı üçün meşələrin qırılmasına və ekoloji problemlərə səbəb olur”.
Ekspert bildirib ki, Elm və Təhsil Nazirliyi artıq elektron dərsliklərlə bağlı müvafiq portal yaradıb:
“Bir neçə ildir ki, elektron dərsliklər Nazirliyin internet portalında yerləşdirilir. Kağız formatda dərsliyi əldə edə bilməyənlər həmin dərslikləri elektron şəkildə yükləyə bilirlər. Bu imkan regionlarda yaşayan vətəndaşlar üçün də əlçatandır. Lakin bəzi ərazilərdə internet və elektrik enerjisi ilə bağlı problemlər mövcuddur”.
E.Əfəndi qeyd edib ki, bu problemlərin aradan qaldırılması istiqamətində dövlət tərəfindən ciddi addımlar atılır:
“Bəzi bölgələrdə fiber-optik xətlər çəkilir, internetin keyfiyyəti yüksəldilir, yeni enerji qurğuları quraşdırılır. Bu tədbirlərin qarşıdakı 3–4 il ərzində tam reallaşdırılması planlaşdırılır. Bundan sonra rəqəmsal dərsliklərdən daha rahat istifadə mümkün olacaq”.
Təhsil eksperti vurğulayıb ki, elektron dərsliklər şagirdlər, müəllimlər və valideynlər üçün bir sıra üstünlüklər yaradır:
“Rəqəmsal dərsliklərə çıxış daha asandır. Dərsliklərdə olan nöqsanları qeyd etmək, müəlliflərə çatdırmaq mümkündür. Vizual imkanlar genişdir – şəkillər, sxemlər, animasiyalar mövzuların daha aydın qavranılmasına kömək edir. Eyni zamanda şagirdlər ağır məktəb çantalarından xilas olurlar. Bu da bel əyriliyi və skolioz kimi sağlamlıq problemlərinin riskini azaldır”.
Ekspert elektron dərsliklərin mənfi tərəflərinə də toxunub:
“Uzun müddət planşet və digər elektron vasitələrdən istifadə göz sağlamlığına mənfi təsir göstərə bilər. Bunun qarşısını almaq üçün valideynlər uşaqları qoruyucu eynəklərlə təmin etməlidirlər”.
Sonda E.Əfəndi bildirib ki, elektron formatda təqdim olunan dərsliklər şagirdlər üçün daha cəlbedicidir:
“Müasir dövrdə uşaqlar informasiyanı əsasən texnoloji vasitələr üzərindən qəbul edirlər. Buna görə də dərsliklərin də həmin platformalarda təqdim olunması daha məqsədəuyğundur”.
