Şahin Tağıyev 3 fevral 1949-cu ildə Tərtər şəhərində anadan olub. Əslən Şuşadan olan Milli Qəhrəman uşaqlıq və gənclik illərini Bakının Bülbülə qəsəbəsində keçirib. Orta təhsilinin bir hissəsini 208 saylı məktəbdə alan Şahin Tağıyev daha sonra 12 saylı internat məktəbində və Energetika texnikumunda təhsil alıb. 1969-cu ildə texnikumu bitirdikdən sonra təyinatla Rusiyanın Udmurt vilayətinə göndərilib.

1988-ci ildən milli azadlıq hərəkatına qoşulan Şahin Tağıyev Dağlıq Qarabağ münaqişəsi başlayandan sonra könüllü olaraq döyüşlərə qatılıb. O, Tərtər, Seysulan, Yarımca və Levonarx istiqamətlərində gedən döyüşlərdə şücaət göstərib. “Qurtuluş” batalyonunda vuruşan Şahin Tağıyev sonradan həmin batalyonun komandiri olub.

Azərbaycan Respublikası Prezidenti Əbülfəz Elçibəyin 23 iyun 1992-ci il tarixli fərmanı ilə Şahin Tağıyev “Azərbaycanın Milli Qəhrəmanı” adına layiq görülüb. O, bu ali ada layiq görülən ilk dörd şəxsdən biri kimi tarixə düşüb.

Milli Qəhrəman 1993-cü ildə döyüşlərin birində ağır yaralanıb və uzunmüddətli müalicədən sonra polkovnik-leytenant rütbəsi ilə ordudan tərxis olunub. Sonrakı illərdə Qarabağ Koordinasiya Şurasında və Qarabağ Azadlıq Təşkilatında fəal fəaliyyət göstərib. 2001-ci ildən etibarən İsveçdə mühacirətdə yaşayıb.

Şahin Tağıyev 29 dekabr 2025-ci ildə İsveçin Malmö şəhərində vəfat edib və 15 yanvar 2026-cı ildə Hərbi Memorial Məzarlıq – İkinci Fəxri Xiyabanda dəfn olunub.

Bu gün Azərbaycan xalqı Milli Qəhrəmanını doğum günündə dərin hörmət və ehtiramla xatırlayır.

QanunTV.az