Son günlər sosial şəbəkələrdə vətəndaşları saxta kampaniyalara cəlb etmək məqsədilə eyni məzmunlu paylaşımlar yayılır.

Paylaşımlarda fərqli məhsullar təqdim olunsa da, ssenari eynidir: guya şirkət sirri açıqlanır, kiçik məbləğ qarşılığında dəyərli hədiyyə vəd edilir və istifadəçilər rəy bölməsində yerləşdirilən linkə keçid etməyə yönləndirilir.

Diqqət çəkən məqam isə etibarlılıq görüntüsü yaratmaq üçün həmin postlara saxta profillər vasitəsilə “müsbət rəylər” yazılmasıdır.

Daxili İşlər Nazirliyi vətəndaşlara tövsiyə edir:

● Şübhəli linklərə daxil olmayın;
● Tanımadığınız səhifələrin təqdim etdiyi “sərfəli ● kampaniyalara” inanmayın;
● Şəxsi və bank kartı məlumatlarınızı naməlum platformalarda paylaşmayın.

Qeyd olunur ki, bu cür saxta kampaniyalar şəxsi məlumatların və pul vəsaitlərinin ələ keçirilməsinə yönəlib. Həmin səhifələrlə bağlı araşdırmalar davam etdirilir.