Ziyarət zamanı Leyla Əliyevaya mərkəzin fəaliyyəti, strukturu və tarixi barədə ətraflı məlumat təqdim olunub. Qeyd edilib ki, Bakı Şəhər Narkoloji Mərkəzi Azərbaycanda ilk narkoloji tibbi müəssisə olaraq 1980‑ci ildə yaradılıb və əvvəlcə “Bakı Şəhər Narkoloji Dispanseri” kimi fəaliyyət göstərib. 2012‑ci ildə əsaslı təmir edilərək yenidən istifadəyə verilmiş mərkəz 2020‑ci ildə publik hüquqi şəxs statusu alıb.

Mərkəz paytaxtın 12 rayonunu əhatə edir və gündə 200–300 vətəndaşa xidmət göstərmək gücündədir. Burada narkotik maddələrin istifadəsindən, alkoqolizmdən və toksiki maddələrin təsirindən yaranan psixi və davranış pozuntularının müalicəsi ilə bağlı tibbi xidmətlər həyata keçirilir. Sifilis, İİV, Hepatit B və C kimi xəstəliklərə dair müayinələr də aparılır.

Leyla Əliyeva mərkəzin qeydiyyat, qəbul, həkim, baş tibb bacısı və manipulyasiya otaqlarında olub, tibbi personal ilə söhbət edib və onlarla birlikdə fotolar çəkdirib.