Azərbaycan Prezidenti İlham Əliyev Xalq artisti Rasim Balayevin vəfatı ilə bağlı nekroloq imzalayıb.
“Qanuntv.az ”ın məlumatına görə, nekroloqda deyilir:
Azərbaycan mədəni ictimaiyyətinə ağır itki üz vermişdir. Milli kino sənətinin görkəmli nümayəndəsi, Azərbaycan Kinematoqrafçılar İttifaqının sədri, Prezidentin fərdi təqaüdçüsü, Dövlət mükafatı laureatı, Xalq artisti Rasim Əhməd oğlu Balayev 2026-cı il martın 29-da ömrünün 78-ci ilində vəfat etmişdir.
Rasim Balayev 1948-ci il avqustun 8-də Ağsu şəhərində anadan olmuş, Azərbaycan Dövlət İncəsənət İnstitutunda təhsil almış və 1972-ci ildən “Azərbaycanfilm” kinostudiyasının aktyoru olmuşdur. O, həmçinin 1990-cı ildən Azərbaycan Kinematoqrafçılar İttifaqının idarə heyətində fəaliyyət göstərmiş, 2022-ci ildə isə İttifaqın sədri seçilmişdir.
Sənətkarın ekran həyatı verdiyi obrazlar geniş tamaşaçı kütləsi tərəfindən rəğbətlə qarşılanmış, baş rollarda çəkildiyi filmlər Azərbaycan kinosunun qızıl fonduna daxil olmuşdur. Rasim Balayev həm milli-mənəvi dəyərlərin təbliği, həm də gənc nəslin vətənpərvər ruhda tərbiyəsində böyük xidmətlər göstərmişdir. Onun ifasında Babək və Nəsimi obrazları xüsusi uğur qazanmışdır.
Rasim Balayev həmçinin ictimai xadim kimi tanınır, milli-mənəvi dəyərlərin qorunmasına böyük töhfələr vermişdir. Görkəmli sənətkar müxtəlif illərdə yüksək dövlət mükafatlarına layiq görülmüş, “Şöhrət”, “Şərəf” və “İstiqlal” ordenləri ilə təltif edilmişdir.
Allah rəhmət eləsin!
Nekroloqu imzalayanlar arasında Prezident İlham Əliyev, Birinci vitse-prezident Mehriban Əliyeva, Baş nazir Əli Əsədov, Milli Məclisin sədri Sahibə Qafarova, eləcə də digər tanınmış ictimai və mədəniyyət xadimləri – Samir Nuriyev, Eldar Əzizov, Fərəh Əliyeva, Adil Kərimli, Polad Bülbüloğlu, Anar Rzayev, Hacı İsmayılov, Şəfiqə Məmmədova, Oqtay Mirqasımov və Fəxrəddin Manafov yer alıb.
