Qanuntv.az xəbər verir ki, Azərbaycanın İnsan Hüquqları üzrə Müvəkkili (Ombudsman) Səbinə Əliyeva 31 Mart – Azərbaycanlıların Soyqırımı Günü ilə bağlı bəyanat yayıb.
Bəyanatda qeyd olunub ki, tarixin müxtəlif mərhələlərində azərbaycanlılar ermənilər tərəfindən məqsədyönlü etnik təmizləmə və soyqırımı siyasətinə məruz qalıb, milli və dini mənsubiyyətinə görə minlərlə insan qətlə yetirilib. Xüsusilə XX əsrin əvvəllərindən etibarən Azərbaycanda və indiki Ermənistan ərazisində sistemli və amansız cinayətlər törədilib.
1918-ci ilin mart-aprel hadisələri bu siyasətin ən qanlı təzahürlərindən biri olub. Şamaxı, Qarabağ, Zəngəzur, Qars, Quba və digər bölgələrdə minlərlə dinc əhali qətlə yetirilib, kəndlər yandırılıb və insan qalıqları kütləvi məzarlarda aşkarlanıb. Arxiv materialları və şahid ifadələri hadisələrin planlı və məqsədyönlü olduğunu təsdiqləyir.
Bəyanatda vurğulanıb ki, Heydər Əliyev tərəfindən 26 mart 1998-ci il tarixli fərmanla 31 Mart Azərbaycanlıların Soyqırımı Günü elan edilib. Bu günün məqsədi soyqırımı faktlarına hüquqi-siyasi qiymət verilməsi və beynəlxalq ictimaiyyətə çatdırılmasıdır.
Ombudsman beynəlxalq təşkilatlar və BMT-nin üzv dövlətlərini azərbaycanlılara qarşı törədilmiş soyqırımı cinayətlərini tanımağa və ədalətin bərpasına çağırıb.
Bəyanat həmçinin BMT Baş katibi, Təhlükəsizlik Şurası, İnsan Hüquqları üzrə Ali Komissar, UNICEF, UNESCO, Avropa İttifaqı, Avropa Şurası, ATƏT, Beynəlxalq və Avropa Ombudsmanlar İnstitutları, Türk Dövlətlərinin Ombudsmanları və digər beynəlxalq və milli insan hüquqları qurumlarına göndərilib.
