Son illər Prezident İlham Əliyevin rəhbərliyi ilə Azərbaycanda müxtəlif sahələr üzrə genişmiqyaslı və sistemli islahatlar həyata keçirilir. Bu islahatlar sosial-iqtisadi inkişafın sürətləndirilməsi, dövlət idarəçiliyində çevik və səmərəli mexanizmlərin formalaşdırılması, eləcə də vətəndaş məmnunluğunun artırılmasına xidmət edir.
Xüsusilə sosial və səhiyyə sahəsində aparılan islahatlar əhalinin rifahının yüksəldilməsini və xidmət keyfiyyətinin artırılmasını hədəfləyir. Son dövrlərdə atılan addımlar Azərbaycanın səhiyyə sistemində yeni mərhələnin başlandığını göstərir.
Bu mərhələ təkcə struktur dəyişiklikləri ilə məhdudlaşmır, eyni zamanda idarəetmə yanaşmasının yenilənməsi, xidmət keyfiyyətinin yüksəldilməsi və vətəndaş yönümlü modelin gücləndirilməsi ilə xarakterizə olunur.
Qeyd olunan islahatların mühüm istiqamətlərindən biri də Tibbi Ərazi Bölmələrini İdarəetmə Birliyi (TƏBİB)-in rolunun genişləndirilməsidir. Yeni yanaşmaya əsasən, TƏBİB yalnız tibb müəssisələrinin idarəedici qurumu kimi deyil, həm də tibbi xidmətlərin təşkili və icrasında əsas icraedici struktur kimi fəaliyyət göstərəcək.
Azərbaycan Prezidentinin “Əhalinin icbari tibbi sığortası sahəsində idarəetmənin təkmilləşdirilməsi ilə bağlı bir sıra tədbirlər haqqında” bu ilin 19 mart tarixli Fərmanı da yeni islahat mərhələsinin hüquqi və institusional əsaslarını formalaşdırır. Fərman icbari tibbi sığorta sistemində funksiyaların yenidən bölüşdürülməsi, idarəetmənin optimallaşdırılması və sosial müdafiə ilə səhiyyə institutları arasında koordinasiyanın gücləndirilməsini nəzərdə tutur.
Eyni zamanda TƏBİB-in Müşahidə Şurasında aparılan dəyişikliklər və yeni təyinatlar sistemin daha çevik və nəticəyönümlü idarə olunmasına xidmət edir.
İslahatlar çərçivəsində maliyyə idarəçiliyinin təkmilləşdirilməsi, şəffaflığın artırılması və resursların daha səmərəli istifadəsi əsas prioritetlərdəndir.
Yeni modelin tətbiqi ilə icbari tibbi sığorta fondunun vəsaitlərinin daha mərkəzləşdirilmiş və effektiv idarə olunması, səhiyyə xərclərinin optimallaşdırılması və maliyyə dayanıqlılığının gücləndirilməsi hədəflənir.
Nəticə etibarilə, həyata keçirilən islahatlar Azərbaycanın səhiyyə sisteminin daha müasir, çevik və vətəndaşyönümlü modelə keçidini təmin etməyə yönəlib. Əsas məqsəd isə əhalinin sağlamlığının qorunması, tibbi xidmətlərin keyfiyyətinin yüksəldilməsi və vətəndaş məmnunluğunun artırılmasıdır.
