Mayın 10-u Azərbaycan xalqının ümummilli lideri, müasir müstəqil Azərbaycan dövlətinin memarı və qurucusu Heydər Əliyevin anadan olmasının 103-cü ildönümüdür. Xalqının taleyində müstəsna rol oynayan dahi şəxsiyyətin zəngin siyasi irsi bu gün də Azərbaycanın inkişaf yolunun əsas dayaqlarından biri kimi dəyərləndirilir.
Azərbaycan tarixində elə şəxsiyyətlər var ki, onların fəaliyyəti yalnız müəyyən bir dövrü deyil, bütöv bir xalqın gələcəyini müəyyənləşdirir. Heydər Əliyev də məhz belə liderlərdən biri idi. Onun ölkəyə rəhbərlik etdiyi dövrlər Azərbaycanın siyasi, iqtisadi və milli yüksəliş mərhələsi kimi yadda qalıb.
1969-cu ildə Azərbaycana rəhbər seçilən Heydər Əliyev qısa müddətdə respublikanın sosial-iqtisadi həyatında mühüm dönüş yaratdı. Sənaye, kənd təsərrüfatı, elm, təhsil və mədəniyyət sahələrində həyata keçirilən islahatlar Azərbaycanın ittifaq daxilində qabaqcıl respublikalardan birinə çevrilməsinə səbəb oldu. Milli kadrların hazırlanması, gənclərin yüksək təhsil almaq üçün müxtəlif şəhərlərə göndərilməsi gələcək dövlətçilik ənənələrinin formalaşmasına mühüm töhfə verdi.
1990-cı illərin əvvəllərində Azərbaycan müstəqilliyini bərpa etsə də, ölkədə hökm sürən siyasi xaos, iqtisadi böhran və parçalanma təhlükəsi dövlətçiliyi ciddi sınaq qarşısında qoymuşdu. Belə bir mürəkkəb və taleyüklü zamanda xalqın tələbi ilə hakimiyyətə qayıdan Heydər Əliyev ölkəni dərin böhrandan çıxarmağa nail oldu.
Onun qətiyyətli siyasəti nəticəsində ölkədə sabitlik təmin edildi, hüquqi dövlət quruculuğunun əsası qoyuldu və Azərbaycan beynəlxalq arenada etibarlı tərəfdaş kimi tanınmağa başladı.
Ümummilli liderin müəllifi olduğu neft strategiyası Azərbaycanın iqtisadi inkişafında mühüm mərhələ oldu. “Əsrin müqaviləsi”nin imzalanması ölkəyə böyük investisiyaların cəlb edilməsinə, iqtisadiyyatın güclənməsinə və Azərbaycanın dünya enerji bazarında strateji mövqeyə sahib olmasına şərait yaratdı.
Heydər Əliyev yalnız siyasi lider deyil, eyni zamanda milli-mənəvi dəyərlərə bağlı dövlət xadimi idi. O, Azərbaycan dilinin, milli kimliyin və vətənpərvərlik ruhunun qorunmasını daim diqqət mərkəzində saxlayırdı. Ulu öndərin “Mən fəxr edirəm ki, azərbaycanlıyam” ifadəsi illərdir xalqın milli qürur simvoluna çevrilib.
Bu gün İlham Əliyev tərəfindən uğurla davam etdirilən siyasi kurs nəticəsində Azərbaycan regionun güclü dövlətinə çevrilib. Dövlətimizin qazandığı uğurlar, beynəlxalq nüfuzu və əldə olunan tarixi qələbələr Heydər Əliyev siyasi məktəbinin uğurlu davamının göstəricisidir.
Azərbaycan xalqı ulu öndər Heydər Əliyevin əziz xatirəsini daim ehtiramla yad edir. Onun dövlətçilik fəlsəfəsi və xalqa xidmət prinsipləri gələcək nəsillər üçün də örnək olaraq qalacaq.
