Azərbaycan ərazisində balıqların kürüləmə dövrü ilə əlaqədar sənaye məqsədilə balıq və digər su bioresurslarının ovu qadağan edilib.
Məlumata görə, Azərbaycan Respublikası Nazirlər Kabinetinin 2017-ci il 2 iyun tarixli qərarı ilə təsdiqlənmiş “Balıq və digər su bioresursları ovunun Qaydaları”na əsasən, mayın 1-dən sentyabrın 1-dək ölkənin bütün su hövzələrində balıq ovuna məhdudiyyət tətbiq olunur.
Bu barədə Kənd Təsərrüfatı Nazirliyi məlumat yayıb.
Bildirilib ki, nazirliyin tabeliyində fəaliyyət göstərən Balıqçılıq və Akvakultura Mərkəzi tərəfindən mart-may aylarında qanunsuz balıq ovunun qarşısının alınması, balıq ehtiyatlarının qorunması və ictimaiyyətin maarifləndirilməsi məqsədilə genişmiqyaslı tədbirlər həyata keçirilib.
Reydlər Daxili İşlər Nazirliyi Su Nəqliyyatında Polis İdarəsi və Dövlət Sərhəd Xidmətinin Sahil Mühafizəsi əməkdaşları ilə birgə təşkil olunub.
Tədbirlər zamanı balıqçılarla maarifləndirici söhbətlər aparılıb, qanunsuz balıq ovu üçün istifadə edilən torlar və digər alətlər sudan çıxarılaraq məhv edilib.
Rəsmi məlumata əsasən, cari ilin yanvarın 1-dən mayın 14-dək keçirilən reydlər nəticəsində qanunsuz balıq ovu ilə məşğul olan 48 nəfər məsuliyyətə cəlb edilib. Onlardan 45-i barəsində inzibati protokol tərtib olunub, üç fakt üzrə isə cinayət məsuliyyəti yarandığı üçün materiallar hüquq-mühafizə orqanlarına göndərilib.
Qeyd olunub ki, mayın 12-də IDEA İctimai Birliyi və Balıqçılıq və Akvakultura Mərkəzinin təşəbbüsü ilə Kür çayının Xəzər dənizinə töküldüyü hissədə təmizlik aksiyası keçirilib.
Aksiyada xüsusi qayıqlardan və sanitar avadanlıqlardan istifadə olunaraq Kür çayının delta hissəsi balıqçılıq torlarından, müxtəlif balıq ovlama alətlərindən və məişət tullantılarından təmizlənib.
Balıqçılıq və Akvakultura Mərkəzi tərəfindən balıq ehtiyatlarının qorunması, qanunsuz balıq ovuna qarşı mübarizə və ekoloji maarifləndirmə tədbirlərinin davam etdirildiyi bildirilib.
