Türkiyə Prezidenti Rəcəb Tayyib Ərdoğan ilə ABŞ Prezidenti Donald Tramp arasında telefon danışığı baş tutub.

Qanuntv.az xəbər verir ki, bu barədə Türkiyə Prezidenti Administrasiyasının İctimaiyyətlə Əlaqələr Departamenti məlumat yayıb.

Məlumata görə, liderlər telefon danışığı zamanı Türkiyə-ABŞ ikitərəfli münasibətlərini, həmçinin regional və qlobal məsələləri müzakirə ediblər.

Rəcəb Tayyib Ərdoğan regionda davam edən münaqişə prosesində atəşkəsin uzadılması qərarını müsbət addım kimi qiymətləndirdiyini bildirib. Türkiyə lideri ixtilaflı məsələlərdə məntiqli həll yolunun tapılmasının mümkün olduğuna inandığını qeyd edib və konstruktiv təşəbbüslərə Ankaranın dəstəyinin davam edəcəyini vurğulayıb.

Bununla yanaşı, Ərdoğan Suriyada sabitlik mühitinin güclənməsinin bütün region üçün mühüm əhəmiyyət daşıdığını diqqətə çatdıraraq, Türkiyənin Suriyaya dəstəyinin fasiləsiz davam etdiriləcəyini bildirib.

Telefon danışığı zamanı Livandakı vəziyyət də müzakirə olunub. Türkiyə Prezidenti bölgədə vəziyyətin daha da gərginləşməsinin qarşısının alınmasının vacibliyini qeyd edib.

Ərdoğan ABŞ-nin San-Dieqo şəhərində yerləşən məscidə edilən hücumla bağlı Donald Trampa başsağlığı da verib. O, dini mənsubiyyətindən asılı olmayaraq bütün nifrət cinayətlərinin qətiyyətlə pisləndiyini vurğulayıb.