İmişli rayonunun Qaragüvəndikli kəndində yaşayan Talıbovlar ailəsi həm çoxuşaqlı, həm də aztəminatlı ailələrdən biridir. Ailədə ümumilikdə 10 nəfər yaşayır — ana, ata və səkkiz övlad.

Ana Aygün Talıbova evdə uşaqların qayğısına qalır, ailənin başçısı Ramil Talıbov isə pambıq sahələrində çalışaraq ailəsini dolandırmağa çalışır. Dövlət tərəfindən sosial yardım alsalar da, gündəlik yaşayış xərclərini qarşılamaq ailə üçün asan deyil.

Buna baxmayaraq, Talıbovlar ailəsi həyatlarından narazı olmadıqlarını deyir. Onların sözlərinə görə, maddi imkanları məhdud olsa da, ailədə sevgi və birlik hökm sürür.

Ailə ilə bağlı sujet hazırlayan İTV İmişlinin Qaragüvəndikli kəndində Talıbovların qonağı olub. Bildirilib ki, ailənin ən böyük övladının 15, ən kiçiyinin isə cəmi doqquz aylıq yaşı var.

Aygün xanım və Ramil bəy 16 ildir ailəlidirlər. Hazırda Ramil bəyin 40, Aygün xanımın isə 35 yaşı var. İllər keçdikcə ailənin təkcə sevgisi deyil, məsuliyyəti də artıb. Səkkiz uşağın qidalanması, geyimi, ayaqqabısı və məktəbli uşaqların dərs ləvazimatları ailənin əsas qayğıları sırasındadır.

Ailə başçısının sözlərinə görə, aylıq xərcləri minimum min manat təşkil edir. Dövlət tərəfindən isə ailəyə 1120 manat sosial yardım ayrılır.

Çətinliklərə baxmayaraq, Talıbovlar ailəsi birlik və sevginin onları ayaqda saxladığını deyir.