Azərbaycan Prezidenti İlham Əliyev Amerika Birləşmiş Ştatlarının Prezidenti Donald Trampa ünvanladığı təbrik məktubunda iki ölkə arasında münasibətlərin uğurla inkişaf etdiyini vurğulayıb.
Qanuntv.az xəbər verir ki, dövlət başçısı ABŞ-nin müstəqilliyinin 250-ci ildönümü münasibətilə göndərdiyi məktubda Azərbaycan–ABŞ strateji tərəfdaşlığının əhəmiyyətini xüsusi qeyd edib.
Prezident İlham Əliyev bildirib ki, son dövrdə Azərbaycan ilə ABŞ arasında münasibətlərin yüksələn xətlə inkişaf etməsi məmnunluq doğurur.
"Biz iki ölkə arasında təşəkkül tapmış strateji tərəfdaşlıq münasibətlərini yüksək qiymətləndirir, dövlətlərarası əlaqələrimizin güclənməsinə daim verdiyiniz böyük önəmə və dəstəyə görə Sizə minnətdarlığımızı bildiririk", – deyə məktubda qeyd olunub.
Dövlət başçısı vurğulayıb ki, fevral ayında imzalanan Strateji Tərəfdaşlıq Xartiyası iqtisadiyyat, enerji, bağlantılar, təhlükəsizlik, rəqəmsal transformasiya və süni intellekt kimi mühüm istiqamətlərdə əməkdaşlığın inkişafına yeni imkanlar yaradacaq.
İlham Əliyev məktubunda ABŞ rəhbərliyinin Cənubi Qafqazda sülhün təşviqi və dayanıqlı inkişafın təmin olunması istiqamətində göstərdiyi səyləri də yüksək qiymətləndirib.
Prezident qeyd edib ki, ötən ilin 8 avqust tarixində Ağ Evdə keçirilən üçtərəfli görüş regionda yeni müsbət siyasi mühitin formalaşmasına təkan verib.
"Artıq Azərbaycan ilə Ermənistan sülh şəraitində yaşayır və ticarət münasibətləri qururlar. Eyni zamanda regionda sabitliyə və rifaha xidmət edən infrastruktur layihələrinin, xüsusilə də Asiya ilə Avropa arasında alternativ, etibarlı və təhlükəsiz bağlantını təmin edəcək "Trampın Beynəlxalq Sülh və Rifah Marşrutu"nun reallaşmasına ölkənizin göstərdiyi davamlı dəstəyini xüsusi qeyd etmək istərdim", – deyə dövlət başçısı vurğulayıb.
