Texnologiya fənni üzrə sertifikatlaşdırma imtahanında iştirak edən bir qrup müəllim test tapşırıqlarından bəzilərinin səhv tərtib olunduğunu iddia edərək onların ləğv edilməsini tələb edir.
Müəllimlərin adından məsələ ilə bağlı müraciət edən Elamin Əsədov bildirib ki, 2026-cı il iyunun 25-də keçirilən sertifikatlaşdırma imtahanında yer alan 34 və 42-ci suallar dərsliklərə və metodik vəsaitlərə uyğun gəlmir.
Onun sözlərinə görə, 42-ci sualda mişarlama prosesi ilə bağlı terminoloji uyğunsuzluq mövcuddur. Sualda "Hansı mişarlama məmulatın üst qatının son tamamlama işləri zamanı istifadə olunur?" ifadəsinin yer aldığını qeyd edən müəllim iddia edir ki, texnologiya fənnində "son tamamlama" ayrıca mişarlama əməliyyatı deyil, yeyələmə prosesinin mərhələlərindən biridir.
Müraciətdə vurğulanır ki, cavab variantlarında göstərilən "çarpaz" və "dairəvi" anlayışları mişarlama üsulu deyil, yeyələmənin növləridir. Müəllimlərin fikrincə, "dairəvi mişarlama" anlayışı nə istehsalat praktikasında, nə də dərsliklərdə istifadə olunur. İddialara əsasən, sual 2013-cü ildə nəşr olunmuş 6-cı sinif "Texnologiya" metodik vəsaitindən götürülüb və tərcümə zamanı terminoloji səhvə yol verilib.
Şikayətçilər 34-cü sualla bağlı da iradlarını bildiriblər. Onların sözlərinə görə, düzgün cavab kimi təqdim olunan "ayrı-ayrı mənbələrdən gəlirlər" ifadəsi dərslikdə bu formada yer almır. Bildirilir ki, 6-cı sinif texnologiya dərsliyində "qiymətli kağızlardan gəlirlər" ayrıca gəlir mənbəyi kimi göstərilib və bu da müxtəlif cavabların düzgün hesab edilməsinə səbəb ola bilər.
Müəllimlər həmçinin inteqrasiya mövzusu ilə bağlı təqdim olunan sualdan da narazıdırlar. Onların fikrincə, materialların davamlılıq xüsusiyyətlərinin araşdırılması ilə bağlı verilən situasiya fəndaxili deyil, fənlərarası inteqrasiyaya aiddir. Şikayətçilər hesab edirlər ki, sualda nə üfüqi, nə də şaquli fəndaxili inteqrasiyanın əlamətləri öz əksini tapıb.
Müəllimlər iddialarını əsaslandırmaq üçün texnologiya fənni üzrə dərsliklərdən və metodik vəsaitlərdən müvafiq hissələri təqdim etdiklərini bildiriblər.
Məsələ ilə bağlı Azərbaycan Respublikasının Təhsil İnstitutundan verilən açıqlamada qeyd olunub ki, sertifikatlaşdırma prosesi ilə əlaqədar bəzi fənlər üzrə test tapşırıqları barədə müxtəlif fikirlər səsləndirilir.
Qurumdan bildirilib ki, qüvvədə olan qaydalara əsasən, iştirakçılar imtahandan sonra təqdim olunan test tapşırıqları ilə tanış ola, cavablarını təhlil edə və nəticələrlə bağlı narazılıqları olduğu halda bir ay müddətində apellyasiya müraciəti edə bilərlər.
Açıqlamada vurğulanıb ki, hazırda daxil olmuş apellyasiya müraciətlərinə müəyyən edilmiş prosedurlara uyğun baxılır, test tapşırıqları isə müvafiq fənn və metodika mütəxəssisləri tərəfindən təhlil edilir. Həmçinin qeyd olunub ki, test nəticələri sualların etibarlılığı, çətinlik dərəcəsi, uyğunluğu və digər göstəricilər üzrə aparılan psixometrik təhlillər əsasında qiymətləndirilir.
Təhsil İnstitutu əlavə edib ki, apellyasiya prosesinin yekunlaşmasından sonra sertifikatlaşdırma ilə bağlı ictimaiyyəti maraqlandıran məsələlər barədə ətraflı məlumat veriləcək.
