Azərbaycanda 16 yaşadək uşaqların sosial şəbəkələrdə qeydiyyatına məhdudiyyət qoyulması, 16-18 yaş arası yeniyetmələrin isə valideyn razılığı ilə bu platformalardan istifadə etməsini nəzərdə tutan qanunvericilik dəyişiklikləri parlamentin üçüncü oxunuşundan keçib.
Mütəxəssislər hesab edirlər ki, yeni tənzimləmələr təhsil sisteminə də müsbət təsir göstərə bilər. Bakı şəhəri 210 nömrəli tam orta məktəbin riyaziyyat müəllimi Aidə Kamilovanın fikrincə, sosial şəbəkələrin geniş yayılmadığı dövrdə şagirdlərin diqqət, mütaliə və məntiqi düşünmə bacarıqları daha yüksək səviyyədə idi.
Onun sözlərinə görə, əvvəlki dövrlərdə şagirdlər daha çox kitab oxuyur, müəllimlə canlı ünsiyyət qurur və bir mövzu üzərində daha uzun müddət diqqətlərini cəmləyə bilirdilər. Bu isə onların oxuyub-anlama, təhlil və analiz qabiliyyətlərinin inkişafına mühüm töhfə verirdi.
Müəllim bildirib ki, müasir dövrdə informasiyanın sürətlə əlçatan olması mühüm üstünlük sayılsa da, sosial şəbəkələrdən həddindən artıq istifadə diqqətin tez yayınmasına, mütaliə vərdişinin zəifləməsinə və dərsə marağın azalmasına səbəb olur.
Ekspertin fikrincə, problemin əsas məğzi sosial şəbəkələrin mövcudluğu deyil, onlardan düzgün və nəzarətli istifadə edilməsidir. Valideynlər, müəllimlər və cəmiyyətin birgə fəaliyyəti nəticəsində uşaqların rəqəmsal mühitdən səmərəli şəkildə faydalanması təmin edilə bilər.
Aidə Kamilova hesab edir ki, yaş məhdudiyyətlərinin tətbiqi şagirdlərin diqqətinin daha çox təhsilə yönəlməsinə, canlı ünsiyyət və sosial bacarıqlarının inkişafına şərait yaradacaq. Bununla yanaşı, müəllim-şagird münasibətlərinin daha sağlam formalaşmasına və akademik nəticələrin yüksəlməsinə də müsbət təsir göstərə bilər.
Mütəxəssislər vurğulayırlar ki, qanunvericilikdə edilən dəyişikliklərin effektiv olması üçün valideyn nəzarəti, rəqəmsal savadlılığın artırılması və sosial şəbəkələrdən istifadə mədəniyyətinin formalaşdırılması da xüsusi əhəmiyyət daşıyır. Bu istiqamətdə atılacaq addımların Azərbaycan təhsilinin keyfiyyətinə uzunmüddətli töhfə verəcəyi gözlənilir.
