Ölümlə nəticələnən yol-nəqliyyat hadisəsi törətmək və hadisə yerindən qaçmaqda təqsirli bilinərək 5 il 2 ay müddətinə azadlıqdan məhrum edilən "Arzum 9999" ləqəbli tiktoker İlduzə Hacıyeva ilə bağlı məhkəmə işinin yeni təfərrüatları məlum olub.
Qanuntv.az xəbər verir ki, "Qafqazinfo"nun yaydığı məlumata görə, məhkəmə materiallarında bir sıra diqqətçəkən məqamlar yer alıb.
Məlumata əsasən, İlduzə Hacıyevanın Azərbaycan Respublikası Daxili İşlər Nazirliyi tərəfindən verilmiş sürücülük vəsiqəsi olmayıb. Baş Dövlət Yol Polisi İdarəsinin təqdim etdiyi məlumatda onun adına ölkə daxilində verilmiş sürücülük vəsiqəsinin qeydiyyata alınmadığı təsdiq edilib. O, avtomobili Almaniya Federativ Respublikası tərəfindən verilmiş müddətsiz "B" kateqoriyalı sürücülük vəsiqəsi ilə idarə edib.
Bildirilib ki, qanunvericiliyə əsasən, xarici ölkə tərəfindən verilmiş sürücülük vəsiqəsi ilə vətəndaşlar Azərbaycanda yalnız müəyyən müddət ərzində avtomobil idarə edə bilərlər. İ.Hacıyeva bu əsasla özəl şirkətlərdən birindən "Changan Qiyuan A05 Plug-in Hibrid" markalı avtomobili gündəlik 60 manat olmaqla 10 gün müddətinə icarəyə götürüb.
Şirkət rəhbərinin şahid qismində verdiyi ifadəyə görə, qəza baş verdikdən sonra tiktokerlə əlaqə saxlanılıb və avtomobilin vəziyyəti ilə maraqlanılıb. İlduzə Hacıyeva isə qəzada iştirak etmədiyini və avtomobilin hər hansı zərər görmədiyini bildirib. Daha sonra avtomobil hava limanı ərazisindən təhvil alınıb.
Məhkəmə materiallarında onun hadisədən sonra tibb müəssisəsinə müraciət etməsi ilə bağlı məlumatlar da yer alıb. TƏBİB-in təqdim etdiyi sənəddə qeyd olunub ki, İ.Hacıyeva hadisə günü saat 01:34-də tibb mərkəzinə daxil olub və ona "isterik nevroz" diaqnozu qoyulub. İlkin tibbi yardım göstərildikdən sonra o, saat 01:55-də xəstəxananı tərk edib.
Xəzər Rayon Məhkəməsi hökm çıxararkən İlduzə Hacıyevanın iki azyaşlı olmaqla dörd övladının olmasını və əvvəllər məhkum edilməməsini yüngülləşdirici hal kimi nəzərə alıb. Bununla yanaşı, zərərçəkmiş tərəflə barışığın əldə olunmaması və hadisə yerindən uzaqlaşması ağırlaşdırıcı hal hesab edilib.
Qeyd edək ki, bu ayın 2-də həbs edilən İlduzə Hacıyeva həm ibtidai istintaq, həm də məhkəmə prosesi zamanı özünü təqsirli bilmədiyini bildirib. O, qəza anını əks etdirən görüntülərə əsaslanaraq günahsız olduğunu iddia edib.
Məhkəmənin qərarı sosial şəbəkələrdə geniş müzakirələrə səbəb olub və istifadəçilərin bir qismi hökmə etirazlarını ifadə ediblər.
