Müəllim – sadəcə bir peşə deyil, bu ad ömrünü başqalarının uğuruna sərf edən, cəmiyyətin təməlini qurmaq üçün səssizcə çalışan insanların adıdır. Hər il oktyabrın 5-i Müəllimlər Günü kimi qeyd olunur və bu əlamətdar gün, məhz belə fədakar insanların əməyinə ehtiramın bir ifadəsidir.
Bu münasibətlə Şəmkir rayonunun Qaralar kənd tam orta məktəbinin direktoru Flora müəllimə və onun rəhbərlik etdiyi pedaqoji heyəti ürəkdən təbrik edirik.
Flora müəllimə uzun illərdir ki, məktəb rəhbəri kimi təhsilin keyfiyyətinin yüksəldilməsi, gənc nəslin bilikli, vətənpərvər və milli dəyərlərə sadiq ruhda yetişməsi üçün yorulmadan çalışır. Onun rəhbərliyi ilə Qaralar kənd məktəbi bu gün rayonda nümunəvi təhsil ocaqlarından biri kimi tanınır. Həm akademik, həm də sosial sahələrdə əldə olunan uğurlar, bu kollektivin işinə olan məsuliyyətinin və peşəkarlığının göstəricisidir.
Məktəbin müəllimləri hər bir şagirdə yalnız dərs keçmirlər, həm də onlara həyat dərsi verirlər. Onlar sevgi ilə, qayğı ilə, səbir və əzm ilə gələcəyimizin formalaşmasında mühüm rol oynayırlar. Qaralar kənd məktəbinin müəllimləri üçün hər bir şagirdin uğuru – öz zəhmətlərinin bəhrəsidir. Bu isə əsl müəllimlik missiyasının göstəricisidir.
