Azərbaycan Respublikasının Prezidenti İlham Əliyev Birləşmiş Ərəb Əmirliklərinin paytaxtı Əbu-Dabi şəhərində keçirilən mərasimdə “Zayed İnsan Qardaşlığı Mükafatı” ilə təltif olunub.

Dövlət başçısı çıxışı zamanı bu mükafatı almağın onun üçün böyük şərəf olduğunu bildirib:

“Bu mükafatı almaq mənim üçün böyük şərəfdir. Bu qiymətləndirmə həm də Azərbaycanın sülhə və əməkdaşlığa verdiyi töhfənin beynəlxalq səviyyədə tanınmasıdır”, – deyə Prezident qeyd edib.

Prezident İlham Əliyev çıxışında regionda yeni mərhələnin başlandığını vurğulayaraq bildirib ki, artıq uzun müddətdir sülh şəraitində yaşayırıq:
“Altı aydır ki, sülh şəraitində yaşayırıq. Bu, Azərbaycan tarixində mühüm mərhələdir və gələcək inkişaf üçün böyük imkanlar yaradır”, – deyə dövlət başçısı əlavə edib.

Prezident həmçinin qeyd edib ki, Azərbaycanın əsas məqsədi Cənubi Qafqazda uzunmüddətli sabitliyin təmin olunması, qarşılıqlı etimadın möhkəmləndirilməsi və əməkdaşlıq mühitinin formalaşdırılmasıdır.

Qeyd edək ki, “Zayed İnsan Qardaşlığı Mükafatı” dünyada sülh, humanizm və xalqlar arasında dialoqu təşviq edən şəxslərə təqdim olunur.