Azərbaycan kibercinayətkarlığa qarşı beynəlxalq mübarizə mexanizmlərinə qoşulmasını rəsmiləşdirib. Prezident İlham Əliyev BMT-nin Birləşmiş Millətlər Təşkilatı “Kibercinayətkarlığa qarşı” Konvensiyasının Azərbaycanın bəyanat və qeyd-şərtləri ilə təsdiq edilməsi haqqında qanunu imzalayıb.

Qanuna əsasən, Konvensiya çərçivəsində kibercinayətlərlə bağlı qarşılıqlı hüquqi yardım sorğularının qəbulu və icrası, eləcə də 24 saat fəaliyyət göstərən əlaqə mərkəzinin funksiyaları Dövlət Təhlükəsizliyi Xidmətinə həvalə edilir. Digər iştirakçı dövlətlərlə operativ informasiya mübadiləsi və konkret tədbirlərin həyata keçirilməsi də bu qurum tərəfindən təmin olunacaq.

Ekstradisiya və müvəqqəti həbsə dair sorğuların göndərilməsi və qəbulu isə Ədliyyə Nazirliyi tərəfindən həyata keçiriləcək.

Xatırladaq ki, Konvensiya 24 dekabr 2024-cü ildə BMT Baş Assambleyasında qəbul olunub və kibercinayətkarlığa qarşı qlobal səviyyədə hüquqi cəhətdən məcburedici ilk beynəlxalq sənəd hesab edilir.

Rəsmi məlumatlara görə, Azərbaycan sənədin hazırlanması prosesində fəal iştirak edib və danışıqlarda prinsipial mövqe sərgiləyərək mətnin formalaşmasına töhfə verib.

Konvensiyanın ratifikasiyası elektron sübutlarla bağlı beynəlxalq prosedurların tətbiqini asanlaşdıracaq, transmilli istintaqların effektivliyini artıracaq və kibercinayətlərə operativ reaksiya imkanlarını genişləndirəcək.