Şəhid Anar Əliyevin həyat yoldaşı Vüsalə Əliyevaya leytenant rütbəsi təqdim olunub.
“Qanuntv.az” xəbər verir ki, bu barədə məlumatı “Modern.az” yayıb.
Bildirilib ki, polkovnik-leytenant, şəhid Anar Əliyevin həyat yoldaşı olan Vüsalə Əliyeva bu gün gömrük orqanlarında xidmətə yeni qəbul edilən əməkdaşların andiçmə mərasimində iştirak edib.
Ona tədbir zamanı leytenant rütbəsi təqdim olunub.
Vüsalə Əliyeva çıxışında gömrük əməkdaşı kimi andiçmə mərasimində iştirak etməyin qürurverici və məsuliyyətli olduğunu bildirib. O qeyd edib ki, dövlətə və xalqa sədaqətlə xidmət edəcəklərinə and içiblər.
Şəhid xanımı vurğulayıb ki, Vətən Müharibəsi Qəhrəmanının həyat yoldaşı olaraq bu gün qrup komandiri kimi öndə addımlaması onun üçün ikiqat məsuliyyət və qürur hissi yaradıb.
O, həmçinin Heydər Əliyevin müəyyən etdiyi inkişaf strategiyasının Prezident İlham Əliyev tərəfindən uğurla davam etdirildiyini bildirib və dövlət rəhbərliyinə təşəkkür edib.
Vüsalə Əliyeva qeyd edib ki, ötən ilin may ayında kiçik leytenant rütbəsi alıb, bu il isə yeni əmrlə leytenant rütbəsinə layiq görülüb. O, Şahin Bağırova təşəkkürünü ifadə edib.
Qeyd edək ki, Anar Əliyev Zəngilan, Cəbrayıl, Füzuli və Xocavənd istiqamətlərində gedən döyüşlərdə iştirak edib, həmçinin Şuşaya giriş əməliyyatına rəhbərlik edən hərbçilərdən biri olub.
