IV Şuşa Qlobal Media Forumunda çıxış edən Azərbaycan Prezidenti İlham Əliyev ölkənin xarici siyasəti, beynəlxalq təşkilatlarla münasibətləri, enerji təhlükəsizliyi və regional proseslərlə bağlı bir sıra mühüm mesajlar səsləndirib.
Prezident bildirib ki, Azərbaycan həm Qərb, həm də Şərq istiqamətində yerləşən qonşu dövlətlərlə qarşılıqlı hörmət və əməkdaşlıq prinsiplərinə əsaslanan münasibətlər qurub.
Dövlət başçısının sözlərinə görə, Azərbaycanın xarici siyasətində balanslaşdırılmış yanaşma mühüm yer tutur və bu siyasət ölkənin beynəlxalq nüfuzunun artmasına səbəb olub.
İlham Əliyev çıxışında Avropa Komissiyası və Avropa Şurası Parlament Assambleyası (AŞPA) ilə münasibətlərə də toxunaraq, bəzi Avropa institutlarında Azərbaycana qarşı qərəzli yanaşmaların mövcud olduğunu bildirib.
Prezident qeyd edib ki, müəyyən dövrlərdə Avropa Komissiyasında anti-Azərbaycan mövqeyi sərgiləyən qruplar fəaliyyət göstərib. O, bəzi beynəlxalq təşkilatların ölkəmizə qarşı ikili standartlardan çıxış etdiyini vurğulayıb.
Dövlət başçısı Azərbaycanın Avropa Şurasından çıxacağı təqdirdə bunun ölkənin daxili həyatına ciddi təsir göstərməyəcəyini də bildirib:
"Azərbaycan Avropa Şurasından tam şəkildə çıxsa, ölkəmizdə heç kəs bunu hiss etməyəcək".
Prezident çıxışında ABŞ-nin Azərbaycana münasibətinə də toxunaraq, məşhur 907-ci düzəlişin tam ləğv edilməsinin vacibliyini diqqətə çatdırıb. O qeyd edib ki, bu düzəliş uzun illərdir Azərbaycanla ABŞ arasında münasibətlərin inkişafına mənfi təsir göstərən amillərdən biridir.
İlham Əliyev Azərbaycanın beynəlxalq arenada mövqelərinin gücləndiyini bildirərək ölkənin artıq regional çərçivəni aşaraq orta gücə çevrilməkdə olduğunu vurğulayıb.
Prezidentin sözlərinə görə, Azərbaycanın siyasi, iqtisadi və enerji imkanları ölkənin beynəlxalq proseslərdə rolunu daha da artırır.
Dövlət başçısı İslam dünyasında həmrəyliyin əhəmiyyətindən də danışaraq bildirib ki, Azərbaycan hər zaman İslam ölkələri arasında birliyin və əməkdaşlığın tərəfdarı olub.
O qeyd edib ki, İslam Əməkdaşlıq Təşkilatı çərçivəsində həmrəylik sabitliyin, təhlükəsizliyin və qarşılıqlı dəstəyin əsas şərtlərindən biridir.
Enerji məsələlərinə toxunan Prezident İlham Əliyev Azərbaycanın Avropa və qlobal enerji bazarlarındakı mövqeyini daha da gücləndirməyi strateji hədəf kimi müəyyən etdiyini bildirib.
Prezident qeyd edib ki, hazırda Avropa ölkələri ilə təbii qaz təchizatının artırılması istiqamətində danışıqlar aparılır və Azərbaycan etibarlı enerji tərəfdaşı kimi öz mövqeyini möhkəmləndirmək niyyətindədir.
Dövlət başçısı, həmçinin Azərbaycanın artıq Suriyaya qaz nəql etdiyini və gələcəkdə digər qonşu ölkələrə də enerji ixracının genişləndirilməsinin mümkün olduğunu bildirib.
İlham Əliyev vurğulayıb ki, Azərbaycanın enerji siyasəti yalnız iqtisadi deyil, eyni zamanda regional sabitlik və əməkdaşlıq baxımından da mühüm əhəmiyyət daşıyır.
Prezident forum çərçivəsində bir daha bəyan edib ki, Azərbaycan beynəlxalq münasibətlər sistemində müstəqil siyasət yürüdən, milli maraqlarını qətiyyətlə müdafiə edən və geosiyasi əhəmiyyəti getdikcə artan dövlət kimi öz mövqeyini daha da gücləndirir.
Qeyd edək ki, "Sülhün təşviqində medianın missiyası: Həqiqətin bərpası və etimadın yenidən qurulması" mövzusuna həsr olunan IV Şuşa Qlobal Media Forumunda dünyanın 53 ölkəsindən 160-a yaxın media nümayəndəsi, ekspert və rəsmi şəxsin iştirakı nəzərdə tutulur.
