Yol-nəqliyyat hadisəsində bir nəfərin ölümünə, digər şəxsin isə xəsarət almasına səbəb olmaqda təqsirləndirilən, sosial şəbəkələrdə "Arzum9999" kimi tanınan bloqer İlduzə Hacıyevanın apellyasiya şikayəti üzrə məhkəmə baxışı keçirilib.

Bakı Apellyasiya Məhkəməsinin qərarı ilə İlduzə Hacıyeva barəsində seçilmiş həbs qətimkan tədbiri ev dustaqlığı ilə əvəz edilib. Məhkəmə qərar qəbul edərkən onun dörd azyaşlı övladının olmasını, onlardan birinin isə ağır autizm xəstəliyindən əziyyət çəkməsini nəzərə alıb.

Qərara əsasən, İlduzə Hacıyevaya ev dustaqlığında olduğu müddətdə sosial şəbəkələrdən istifadə etmək qadağan edilib. O, yalnız telefon vasitəsilə ailə üzvləri ilə əlaqə saxlaya biləcək.

Bundan başqa, müdafiə tərəfinin cinayət işinin yenidən araşdırılması ilə bağlı vəsatəti də təmin olunub. Apellyasiya instansiyasında iş məhkəmə istintaqı ilə araşdırılacaq və tərəflərə yeni sübutların təqdim edilməsi imkanı veriləcək.

Vətəndaşların Əmək Hüquqlarını Müdafiə Liqasının sədri Sahib Məmmədov bildirib ki, ev dustaqlığına buraxılması İlduzə Hacıyevanın barəsində çıxarılmış hökmün ləğv edilməsi anlamına gəlmir.

Onun sözlərinə görə, apellyasiya məhkəməsi azadlıqdan məhrumetmə cəzasını qüvvədə saxlaya, cəzanın müddətini azalda və ya təyin edilmiş cəzanı şərti cəza ilə əvəz edə bilər.

Xatırladaq ki, Xəzər Rayon Məhkəməsinin hökmü ilə İlduzə Hacıyeva 5 il 2 ay müddətinə azadlıqdan məhrum edilmiş və məhkəmə zalında həbs olunmuşdu.

O, Azərbaycan Respublikası Cinayət Məcəlləsinin 263.2-ci (yol hərəkəti və ya nəqliyyat vasitəsinin istismarı qaydalarının pozulması nəticəsində ehtiyatsızlıqdan insan ölümünə səbəb olma) və 264-cü (yol-nəqliyyat hadisəsi yerindən qaçma) maddələri ilə təqsirləndirilir.

Qeyd edək ki, sözügedən yol-nəqliyyat hadisəsi 2025-ci ilin iyun ayında Bakının Xəzər rayonu, Mərdəkan qəsəbəsində baş verib. Qəza nəticəsində bir nəfər həyatını itirib, digər şəxs isə müxtəlif dərəcəli bədən xəsarətləri alıb.