Azərbaycan Respublikasının Prezidenti İlham Əliyev "Yol hərəkəti haqqında" Qanunda edilən dəyişikliklərin icrası ilə əlaqədar bir sıra qanunlara dəyişiklikləri təsdiqləyib.
Qanuntv.az xəbər verir ki, bununla bağlı dövlət başçısı müvafiq qanunu imzalayıb.
Qanuna əsasən, yol hərəkəti iştirakçılarının təhlükəsizliyinin artırılması və mopedlərin iştirakı ilə baş verə biləcək yol-nəqliyyat hadisələrinin qarşısının alınması məqsədilə mopedlərin dövlət qeydiyyatına alınması, uçota qoyulması və onlara dövlət qeydiyyat nişanlarının verilməsi məcburi olacaq.
Yeni qaydalara görə, mopedləri idarə etmək üçün "A1" kateqoriyalı sürücülük vəsiqəsi, nəqliyyat vasitəsinin qeydiyyat şəhadətnaməsi və dövlət qeydiyyat nişanı tələb ediləcək. Bununla yanaşı, nəqliyyat vasitəsi sürücüləri üçün qüvvədə olan bir sıra hüquq və vəzifələr moped sürücülərinə də şamil olunacaq.
Dəyişikliklərə əsasən, mopedlərin texniki baxışdan keçirilməsi, dövlət qeydiyyatı, sürücülük vəsiqəsinin verilməsi və ya dəyişdirilməsi, dövlət qeydiyyat nişanlarının təqdim olunması ilə bağlı dövlət rüsumları da qanunvericiliklə müəyyən edilmiş qaydada tətbiq ediləcək. Eyni zamanda, qeydiyyatdan keçmiş mopedlər üçün üçüncü şəxslər qarşısında mülki məsuliyyətin icbari sığortası da tələb olunacaq.
Qeyd edək ki, qanunvericiliyə əsasən, moped kiçik elektrik nəqliyyat vasitələri istisna olmaqla, elektrik mühərriki ilə işləyən və ya mühərrikinin iş həcmi 50 kubsantimetrdən çox olmayan, maksimal konstruksiya sürəti isə saatda 50 kilometrdən artıq olmayan iki və ya üç təkərli nəqliyyat vasitəsi hesab edilir.
