Azərbaycan Respublikası ilə Özbəkistan Respublikası arasında “Əbədi dostluq haqqında Müqavilə” imzalanıb.
QanunTV xəbər verir ki, sənəd Azərbaycan Prezidenti İlham Əliyevin Özbəkistana dövlət səfəri çərçivəsində Daşkənddə Azərbaycan və Özbəkistan prezidentlərinin iştirakı ilə keçirilən sənədlərin imzalanması mərasimində imzalanıb.
Müqaviləni Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev imzalayıblar.
“Əbədi dostluq haqqında Müqavilə” iki ölkə arasında son illərdə yüksək səviyyəyə yüksələn siyasi etimad və müttəfiqlik münasibətlərinin daha da möhkəmləndirilməsi baxımından mühüm sənəd kimi qiymətləndirilir. Sənəd Azərbaycan-Özbəkistan əlaqələrinin uzunmüddətli və möhkəm hüquqi əsaslar üzərində inkişaf etdirilməsinə yeni imkanlar yaradır.
Qeyd edək ki, imzalanma mərasimində, həmçinin Azərbaycan Respublikası ilə Özbəkistan Respublikasının Ali Dövlətlərarası Şurasının üçüncü iclasının Qərarı və digər sənədlər də imzalanıb.
Bu mühüm sənəd Bakı ilə Daşkənd arasında tarixi dostluq və qardaşlıq münasibətlərinin yeni mərhələyə keçidini rəsmiləşdirən mühüm siyasi addımlardan biri kimi diqqət çəkir.
