2026-cı il mayın 17-22-də Bakıda keçiriləcək Ümumdünya Şəhərsalma Forumu (WUF13)nun əsas tədbirlərini əhatə edən proqram ictimaiyyətə təqdim olunub.
Qanuntv.az xəbər verir ki, proqram dünyanın ən aktual çağırışlarından biri olan mənzil təminatı məsələsinin müzakirəsi üçün müxtəlif maraqlı tərəfləri və həmfikir qrupları bir araya gətirəcək.
“Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusuna həsr olunmuş forum çərçivəsində dayanıqlı şəhər inkişafı ilə bağlı həll yolları, siyasət yanaşmaları və praktiki addımlar geniş müzakirə ediləcək. Tədbir müxtəlif ölkələrin hökumət nümayəndələrini, icmaları, mütəxəssisləri və tərəfdaşları bir araya gətirəcək.
Proqram yüksəksəviyyəli dialoqlar, xüsusi sessiyalar, assambleyalar və dəyirmi masalar kimi müxtəlif formatları əhatə edir.
Yüksəksəviyyəli dialoqlar çərçivəsində qlobal mənzil gündəliyinin əsas istiqamətləri müəyyənləşdiriləcək. Bu müzakirələrdə qlobal mənzil böhranı, qeyri-rəsmi yaşayış məntəqələrinin və gecəqonduların transformasiyası, böhran sonrası şəhərlərin bərpasında mənzil təminatı, iqlim və mənzil siyasəti arasındakı əlaqə, sosial-iqtisadi təsirlər və yeni maliyyələşdirmə yanaşmaları kimi mövzular diqqət mərkəzində olacaq.
Xüsusi sessiyalarda iqlimə uyğunlaşma, inklüziv şəhər inkişafı, rəqəmsallaşma, şəhərlərin yenilənməsi, qeyri-rəsmi yaşayış əraziləri və maliyyələşdirmə mexanizmləri kimi mühüm şəhərsalma məsələləri ətraflı müzakirə olunacaq.
Assambleyalar müxtəlif qrupların – yerli və regional hökumətlərin, vətəndaş cəmiyyəti təşkilatlarının, qadınların, gənclərin, biznes və sənaye nümayəndələrinin, eləcə də parlament üzvlərinin bir araya gələrək qlobal şəhərsalma gündəliyi üzrə ortaq mövqelər formalaşdırmasına imkan yaradacaq.
Forum çərçivəsində keçiriləcək dəyirmi masalar isə tərəfdaşlar arasında dialoqun gücləndirilməsi, ortaq həllərin müəyyənləşdirilməsi və yeni çağırışlara qarşı effektiv yanaşmaların hazırlanmasına xidmət edəcək.
Qeyd edək ki, dəyirmi masalar konkret olaraq 12 sessiyadan ibarət olacaq və aşağıdakı istiqamətləri əhatə edəcək:
● Vahid BMT
● Yerli və regional hökumətlər
● Biznes təşkilatları
● Qadınlar
● Əlilliyi olan şəxslər
● Parlament nümayəndələri
● Akademik dairələr
● Uşaqlar və gənclər
● Peşəkarlar
● Yerli səviyyədə fəaliyyət göstərən və vətəndaş cəmiyyəti təşkilatları
● Yerli xalqların hüquqları
● Yaşlı şəxslərin hüquqları
WUF13 qlobal mənzil təminatı və dayanıqlı şəhər inkişafı sahəsində siyasətin formalaşdırılması, təcrübə mübadiləsi və beynəlxalq əməkdaşlığın gücləndirilməsi baxımından mühüm platforma hesab olunur.
