Azərbaycan Respublikasının Prezidenti İlham Əliyev mayın 18-də “Euronews” televiziyasına müsahibə verib.
Qanuntv.az xəbər verir ki, dövlət başçısı müsahibə zamanı Bakıda keçirilən Ümumdünya Şəhərsalma Forumunun 13-cü Sessiyası, Qarabağ və Şərqi Zəngəzurda həyata keçirilən bərpa-quruculuq işləri, Avropanın enerji təhlükəsizliyi və regional proseslərlə bağlı fikirlərini bölüşüb.
Prezident İlham Əliyev bildirib ki, WUF13 forumuna 182 ölkənin nümayəndələrinin qatılması Azərbaycana göstərilən hörmətin nümunəsidir. O qeyd edib ki, forum şəhərsalma sahəsində görülən işlərin təqdim olunması və beynəlxalq təcrübənin öyrənilməsi baxımından mühüm platformadır.
Dövlət başçısı Qarabağ və Şərqi Zəngəzurda həyata keçirilən “Ağıllı şəhər” və “Ağıllı kənd” layihələrinin dünyada bənzər problemlərlə üzləşən ölkələr üçün nümunə ola biləcəyini vurğulayıb. Prezident qeyd edib ki, işğaldan azad olunmuş ərazilərdə paralel şəkildə yollar, tunellər, körpülər, məktəblər, xəstəxanalar və enerji infrastrukturu qurulur.
İlham Əliyev enerji məsələlərinə də toxunaraq bildirib ki, Azərbaycan hazırda 16 ölkəyə təbii qaz ixrac edir və Avropa İttifaqına üzv olan 10 dövlət Azərbaycanın qazını alır. Onun sözlərinə görə, yaxın zamanda yeni yataqdan qaz hasilatına başlanılması ilə bağlı məlumat veriləcək.
Prezident həmçinin Yaxın Şərqdəki gərginliyə münasibət bildirərək qeyd edib ki, Azərbaycan hər zaman diplomatiyanın tərəfdarı olub və enerji təhlükəsizliyinin təmin olunması üçün uzun illərdir şaxələndirilmiş siyasət həyata keçirir.
Müsahibənin sonunda “Euronews” müxbiri Prezident İlham Əliyevlə söhbətin hər zaman maraqlı olduğunu bildirib və Azərbaycana yenidən qayıtmaqdan məmnunluğunu ifadə edib.
