Azərbaycan Respublikasının Prezidenti İlham Əliyev iyulun 11-də Şuşa şəhərinin Qarabağ küçəsində dövlət-özəl tərəfdaşlığı çərçivəsində həyata keçirilən tikinti və inkişaf layihələri ilə tanış olub.
Qanuntv.az xəbər verir ki, Şuşanın Qarabağ küçəsində yerli investorlar tərəfindən dövlət-özəl tərəfdaşlığı əsasında müxtəlif təyinatlı ümumilikdə 10 bina inşa edilib.
Layihə çərçivəsində tikilən obyektlər arasında mehmanxana, apart hotellər, ofis binaları və iaşə müəssisələri yer alır. Tikinti işlərinin həyata keçirilməsi zamanı yüksək keyfiyyət standartlarının təmin olunması ilə yanaşı, yeni tikililərin Şuşa şəhərinin tarixi-memarlıq üslubuna və ümumi görünüşünə uyğunluğuna xüsusi diqqət yetirilib.
Bu layihə Azərbaycanın mədəniyyət paytaxtı olan Şuşanın sosial-iqtisadi inkişafı istiqamətində həyata keçirilən genişmiqyaslı tədbirlərin mühüm tərkib hissəsi hesab olunur. İnşa edilən yeni obyektlər şəhərin memarlıq simasına əlavə gözəllik qatmaqla yanaşı, burada aparılan bərpa və yenidənqurma işlərinin miqyasını da əks etdirir.
Eyni zamanda, layihənin həyata keçirilməsi Şuşanın iqtisadi həyatının canlanmasına, turizm potensialının artırılmasına, yeni iş yerlərinin yaradılmasına və şəhər sakinləri ilə qonaqlar üçün daha əlverişli infrastrukturun formalaşmasına mühüm töhfə verir.
Qeyd edək ki, sözügedən layihə Azərbaycanda dövlət-özəl tərəfdaşlığı modelinin uğurla tətbiq olunduğunu və özəl sektorun işğaldan azad edilmiş ərazilərin bərpası prosesində fəal iştirak etdiyini bir daha nümayiş etdirir.
