Azərbaycan Respublikasının Prezidenti İlham Əliyev mayın 18-də Çin Xalq Respublikası Dövlət Şurasının Baş nazirinin müavini Can Quoçini qəbul edib.
Görüş zamanı qonaq Çin Xalq Respublikasının Sədri Si Cinpin salamlarını dövlət başçısına çatdırıb və onu “Çinin dostu” kimi dəyərləndirdiyini bildirib. Prezident İlham Əliyev isə səmimi salamlar üçün təşəkkür edib və öz salamlarını Çin rəhbərinə çatdırmağı xahiş edib.
Tərəflər Azərbaycan–Çin münasibətlərinin hazırkı inkişaf səviyyəsini yüksək qiymətləndirib və əlaqələrin strateji tərəfdaşlıq səviyyəsinə çatdığını vurğulayıblar.
Görüşdə WUF13 – Ümumdünya Şəhərsalma Forumu 13-cü sessiyası çərçivəsində keçirilən müzakirələrə də toxunulub. Qonaq tədbirin qlobal urbanizasiya gündəliyi üçün mühüm platforma olduğunu qeyd edib və Azərbaycanın ev sahibliyini yüksək qiymətləndirib.
Çin nümayəndəsi Azərbaycanın “vahid Çin” siyasətinə dəstəyini xüsusi qeyd edib və buna görə təşəkkürünü bildirib. Prezident İlham Əliyev isə Azərbaycanın separatizmin bütün formalarını qəti şəkildə pislədiyini vurğulayıb.
Söhbət zamanı iki ölkə arasında iqtisadi-ticarət, nəqliyyat, tranzit, enerji və digər sahələrdə əməkdaşlığın genişləndirilməsi perspektivləri müzakirə olunub.
